San Isidro Azoka izango da bihar Arespalditzan

Aitor Aspuru Saez 2024ko mai. 14a, 12:10

San Isidrok Arespalditzako azoka eremua beteko du. / Aiaraldea.eus

Ohitura handiko hitzordua goizetik eguerdira arte luzatuko da eta adin guztiko herritarrentzako ekintzak antolatuko dituzte.

Bihar izango da San Isidro Azoka Arespalditzan. Ondo eta sakon errotuta dagoen ospakizun horrek herrigunea hartuko du goizeko lehen ordutik Pirenaika Arrazako VIII. Lehiaketarekin. Zehazki, abereak 08:00etatik aurrera helduko dira eta 13:30ean egingo dute sari banaketa.

Bien bitartean, San Isidro Txiki haurtzaindegi zerbitzua eskainiko dute herriko Gizarte Etxean. Hori bai, atzo amaitu zen izena emateko epea.

Edonola ere, 09:30ean hasiko da produktuen azoka eta erakustaldia eta 11:00etan Salvadorreko Landa Eremuko Emakumeen Sareari buruzko erakusketa inauguratuko dute Gizarte Etxean. Ordu erdi beranduago Kalakaren egurrezko jokoak erabiltzeko aukera emango dute eta 12:00etan abiatuko dituzte haurrentzako tailerrak.

Eguerdian bi ekintza gehiago egongo dira. Alde batetik, meza, eta bestetik Soloitza Gaztandegiaren gazta dastatzea, Gizarte Etxean berriro ere.

13:30ean helduko da herri kirolen ordua eta jarraian izango da herri bazkaria, 14:30ean. Aiarako Udaletxean izena eman eta ordaindu beharra dago aurretik.

Bola Txapelketa

Horrez gain, eta ohiturari eutsita, ostiralean bola txapelketa antolatuko du Aiarako Bolatoki Klubak Kexaan. 18:00etan hasi eta 20:00etan amaituko da eta igandean azken jaurtiketak egingo dituzte 12:00etan.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide