Iragan astean izan zen Zorroza Gestión de Residuos lantegian duela lau urte jazotako lan heriotzaren ondoriozko epaiketa, eta atzo dozenaka lagun bildu ziren Murgako lantegiaren aurrean, auziaren ebazpena salatzeko.
2020ko otsailaren 23an gertatutakoa ekarri zuten gogora mobilizazioan. Egun hartan galdu zuen bizitza Bassirou Dionek, 24 urteko gazte senegaldarrak. “Ia 9 metroko altueratik amildu zen, inolako segurtasun neurririk gabe zegoenean”, nabarmendu dute atzoko mobilizazioko deitzaileek, “eta ez hori bakarrik: gertatutakoa ezkutatzen saiatu ziren, gorpua mugitzera behartuz langileak, istripua beste toki batean gertatu zenaren plantak egiteko”.
Nabarmendu dutenez, “langileen eskubideen kontrako esplotazio sistematikoa” zegoen Zorrozan, “eta hala izaten dihardu”. Gauzak hala, ziurtatu dute Dioneren heriotza ez zela “kasu isolatu bat” izan, aurretik ere beste hainbat lan istripu gertatu zirelako.
Epaiketaren ebazpena ere kritikatu dute: Urte eta erdiko kartzela zigorra eta 30.000 euroko kalte-ordainak Zorrozako arduraduenntzat. Horren aurrean, salatu dute sistema honetan “merke” ateratzen dela langileen aurkako esplotazioa, eta “are merkeagoa” ateratzen dela “langilea kanpotik bizitza hobe baten bila etorritakoa bada”.
Atzerritartasun Legearen aurkako aldarria
Era berean, aldarrikatu dute Zorrozako lan heriotza “langile migratuen esplotazioarekin aberasten den sistema kapitalista kolonial baten” ondoriozkoa izan dela, eta horrek badituela “arduradun politikoak”.
Horri lotuta, Atzerritartasun Legea bertan behera uztea exijitu dute, “funtsezko baldintza delako Aiaraldeko bizilagun guztiek, datozen lekutik datozela, modu duinean lan, ikasi eta bizi ahal izan dezaten”.
