Gizonezkoen 34 edizio eta gero, emakumeen I. Aiarako bira antolatuko dute uztailaren 27an eta 28an. Proba bi etapetan banatuko da, Orozko-Laudio eta Amurrio-Amurrio, eta formakuntza mailetako neskei zuzendua da: kadete eta junior. Momentuz 50 kirolarik eman dute izena proban, baina antolatzaileek espero dute 90ra iristea.
Antolatzaileak Arabako Txirrindularitza Federazioa, Kuskumendi Mendi Txirrindularitza taldea, Sociedad Ciclista Llodiana eta Sociedad Ciclista Aiala dira. Azaldu dutenez, “uda bete-betean aukeratu ditugu datak, emakumezko korrikalariek ikasketak amaitu dituztenean, txirrindularitzan erabat murgildu ahal izateko”.
Lehenengo etapa uztailaren 27an izango da, Orozkotik Laudiora. Eguerdiko 15:00etan zuzendarien bilera, eta 14:45ean talde aurkezpena egingo dituzte udaletxean. 16:00etan abiatuko da proba Orozkotik eta Laudiora 17:48an heltzea aurreikusi dute. Aldai plazan egingo da sari banaketa. 57,95 km-ko luzera eta 590m-ko malda izango ditu lehenengo etapa honek.
Bigarrena, berriz, uztailaren 28an izango da, Amurriotik Amurriora. Goizeko 9:30ean zuzendarien bilera eta 9:45ean talde aurkezpena udalexean. 10:30ean abiatuko da etapa Amurriotik, eta San Pedro eta Larrinbetik igaro ostean Amurrion bertan bukatuko da, eguerdiko 12:35ean, aurreikuspenen arabera. Sari banaketa Juan de Urrutia plazan egingo dute. Bigarren etapa honek 63,7 km-ko distantzia eta 870m-ko malda izango ditu.
Maillotak honako hauek izango dira: sailkapen orokorra (Vital Fundazioa), kadete onena (Arabako Foru Aldundia), mendiko saria (RPK), esprintak (Aiarako Kuadrilla), junior I arabarra (Etxeondo) eta kadete I arabarra (Electro Alavesa).
Izaskun Bengoari omenaldia
Aiarako bira honetan Izaskun Bengoa txirrindulari amurrioarra omenduko dute, eskualdean txirrindularitzan aritu ziren emakume aitzindariekin batera. Txirrindulari lasterketarik garrantzitsuenetan aritu zen txirrindularitzan oso emakume gutxi zegoen garaietan.
Amurrio Txirrindulari Klubean eman zituen lehen pedalkadak eta 6 aldiz izan zen Espainiako txapeldun. Bestalde, Italiako Giroan aritu zen 1994, 1996 eta 1997an, eta Frantziako Tourrean 1995 eta 1997an.
Espainiako selekzioarekin Europako hainbat txapelketatan parte hartu zuen, eta zilarrezko domina lortu zuen erlojupekoan eta brontzea Villacheko Lerroan (Austria). 1993, 1994, 1995, 1996 eta 1997ko Munduko Txapelketetan eta 1996ko Atlantako Olinpiar Jokoetan ere aritu zen.
Gaur egun, Martxa Nordikoan ibiltzen da. Espainiako Martxa Nordikoko 2 Kopa irabazi ditu, 3 aldiz izan da Espainiako txapeldunorde, 4 aldiz Espainiako taldekako txapeldun eta 3 aldiz Espainiako Selekzio Autonomikoetako Txapelketa Euskadiko Selekzioarekin.