Aiarako EAJk oharra zabaldu du udalerriko kultura eta kirol elkarteen egoeraz ohartarazteko. Izan ere, azaldu dutenaren arabera, apirilaren 26an argitaratu zen ALHAOn elkarte horiek dirulaguntza eskatzeko deialdia, baina geroztik EH Bilduk eta Aiara Batuzek osatutako gobernu-taldeak “ez du erantzunik ezta informaziorik eman”.
Gentza Alamillok, EAJko zinegotzi eta Aiarako alkate ohiak adierazi duenez, “gobernu-taldearen isiltasunak ziurgabetasun ekonomikoa sortzen ari dio gure udalerriko elkarte-sareari, funtsezko zutabea baita Aiarako kultura- eta kirol-bizitzarako".
Era berean, Alamillok argi utzi nahi izan du udalerriko elkarteek (berezko hitzarmena dutenek salbu) aurten beren jarduera aurrera eramateko “euro bakar bat” ere ez dutela izan, eta ziurtatu du dirulaguntza horiek irailean ebatzi ezean, lehenengo aldia izango dela egoera hori gertatzen dela.
Hortaz, Aiarako EAJk “onartezintzat” jo du EH Bildu eta Aiara Batuzen “kudeaketa falta” eta salatu du kudeaketa horrek “ez dituela udalerriko elkarteak babestu”, baizik eta “egoera konprometituan utzi”.