Aiarako Udalak Foru Aldundiko Mugikortasun Jasangarriaren eta Bide Azpiegituren Departamentura jo du A-3641 errepidean, Zuhatza parean, zer jarduketa aurreikusten dituen jakiteko. Izan ere, ohar bidez zabaldu duenez, errepide horrek baserri ugari ditu ertzetan, eta gero eta ibilgailu gehiago mugitzen dira, bai autoak, bai kamioiak, bai bizikletaketa oinezkoak.
Oharrean azaltzen denaren arabera, "Zuhatzako kontzejuak eta Aiarako Udalak behin baino gehiagotan eskatu dute trafiko astuna errepide egokiagoetara bideratzea, orain arte neurririk hartu gabe".
Orain, Mugikortasun Jasangarriaren eta Bide Azpiegituren diputatuak aurreratu duenez, bide horretan esku hartzeko asmoa dago, baina izan ditzaketen ondorioak ikusita, "Aiarako Udalak informazioa eskatu du jarduera zertan datzan jakiteko eta ekarpenak aurkeztu ahal izateko".
Aiarako Udalak Arabako Foru Aldundiari bidalitako gutunean gogorarazten dionez, "Arabako Batzar Nagusiek mozio bat onartu zuten martxoaren 18an bide-azpiegiturak hobetzeko proiektuetan herritarren parte-hartzea bultzatzeko".
Aiarako Udalak gogorarazi du errepide horrek hainbat tokitan ez duela uzten bi garraio astun igarotzen, eta maiz garraio horiek behar baino azkarrago doazela, baimendutakoa baino azkarrago, eta horrek zaildu egiten duela bidean mantendu ahal izatea eta galtzada-irteerak ugariak dira.