Udal aurrekontuak Garapen Jasangarriko Helburuekin (GJH) bat etortzea nahi du Aiarako EAJk, eta hala eskatu zion udal gobernuari iragan osteguneko plenoan. Jeltzaleek salatu dute EH Bildu eta Aiara Batuzek ez dituztela burutu 2030 Agenda Planari lotutako ekintzak, 2023ko udal aurrekontuetan “horretarako diru-partida bat prestatu bazen ere”.
Horren aurrean, jeltzaleek aldarrikatu dute aurrekontuak ez direla “diru-sarreren eta gastuen taula bat” soilik, “tresna nagusia” direlako politika publikoak planifikatzeko eta garatzeko. Horregatik uste dute “ezinbestekoa” dela “ikuspegi transbertsal eta dimentsioaniztuna” sartzea.
Hori dela eta, EAJk iritzi du beharrezkoa dela Garapen Jasangarriko Helburuekin bat egitea, eta nabarmendu du EAEko hainbat udal jarri direla dagoeneko “norabide horretan lanean”, Eudelek eta Eusko Jaurlaritzak sortutako “tresna-kutxa” baliatuta. Aiaran, aldiz, “urte bat alferrik galdu” dela uste du opozisioko taldeak, udal gobernuak ez duelako “inolako asmorik erakutsi” irizpide horiek barneratzeko.
Jeltzaleen aburuz, helburu horiekin lerrokatzea bada “erantzukizun politiko eta sozialeko” afera, “erretorikatik haratago doana eta ekintza zehatzetan gauzatu behar dena”. Horregatik, Eudelek eta Eusko Jaurlaritzak garatutako tresnak eta metodologiak “berehala” hartzea eskatu diote Udal Gobernuari, modu horretan bermatuko delako “euro publiko bakoitzak herritarren bizi-kalitatea hobetzen lagunduko duela”.