Greba egingo dute Aianoxeko langileek astearte eta ostegunetan, bihartik hasita. Modu horretan, bultzada eman nahi diote hitzarmen kolektiboaren negoziazioei. ELAko bi ordezkari ditu enpresa batzordeak eta LABek eta USOk bana, eta gehiengoak egin du lanuzteak deitzearen alde. Azaldu dutenez, sei bilera egin dituzte dagoeneko zuzendaritzarekin, baina honek ez die helarazitako eskakizunen gutxienekoei erantzun.
Hainbat aldarri dituzte langileen ordezkariek hitzarmenari begira. Alde batetik, soldatak igotzea nahi dute, "langileek erosmen ahalmenaren %14a baino gehiago galdu dutelako azken lau urteetan". Azaldu dutenez, lansarietan %1eko igoera aplikatu zaie 2021tik, Kontsumorako Prezioen Indizea nabarmen gehiago igo den arren eta enpresak urtez urte irabaziak izanda.
Fabrikan denbora gutxiago igarotzea ere eskatu dute, 17 urte daramatelako gehienezko lanaldiarekin, indarrean jarriko den lege berriak 37,5 ordura murriztea eskatuko duen bitartean.
Mediku bajei dagokionez, langileen ordezkariek salatu dute enpresak prestazioak murriztu nahi dituela hilabete bateko baja gainditzen duten langileen kasuan. Bukatzeko, ultraaktibitatearen mugak kentzea ere eskatu dute, enpresak hiru urtera mugatu duela nabarmenduta.