Eskupilotaren mundua Iker Larrazabalari begira dago gaur. Izan ere, olabezarrak ezustekoa eman zuen atzo eta nagusitasunez gailendu zen Jokin Altunaren kontra buruz burukoan. Eibarko Astelena pilotalekuan Altuna III txapela defendatzera atera zen eta ondo hasi zuen partida, 5-1 jarrita markagailua.
Edonola ere, Larrazabalek bere bitarteko guztiak baliatu zituen eta, berdindu ez ezik, 11. puntutik aurrera abantaila handitzen joan zen, 22-14 amaitu arte.
Aiaraldea Komunikabideari egindako adierazpenetan, Larrazabalek ez zuen bere alaitasuna ezkutatu: "Oso pozik nago. Ez nuen espero txapeldunaren kontra irabaztea eta partida oso zaila izan da".
Olabezarrak uste du buruz burukoan asko hobetu duela eta bere itxaropena da horrela egiten jarraitzea eta hurrengo norgehiagokan ere garaipena eskuratzea.
Ezkurdiari ere irabazi zion
Dena den, atzoko lorpena ez zen nolanahi etorri. Buruz Buruko Txapelketako final-laudenetako ligaxkan lehiatzeko erraldoi bat menperatu behar izan zuen Larrazabalek lehenago eta apirilaren 4an Joseba Ezkurdia kanporatu zuen.
Olabezarrak oroitzen du ez zela erronka makala izan: "Partida izugarri zaila izan zen eta asko kostatu zaitzaidan". Horren isla da markagailuak jasotako emaitza norgehiagokaren amaieran: 22-21.
Gauzak horrela, Iker Larrazabalen izenak distira berria irabazi du azken asteetan, Buruz Buruko eta Bikoteko txapelketetako onenei eta Aspe enpresako ikurrei irabazi baitie (aiararrak Baikorako jokatzen du).