Aiarako udal gobernu taldeak Ogasun Batzordean aurkeztu berri du 2025eko aurrekontuen zirriborroa. Izan ere, EH Bilduren helburua da ekainean indarrean sartzea eta, hori errazteko, EAJk izan ditzakeen ideiak lantzeko prest dago.
Guztira, hiru milioi euro baino gehiago baliatzea aurreikusi dute eta Aiara Batuzen zein parte hartzerako prozesuan herritarrek egindako ekarpenak ere islatu dituzte. Pruden Otegi alkateak balioan jarri ditu, bereziki, aiararrek egindako iradokizunak. Horien artean daude Arespalditza eta Ibaguengo igerilekuen arteko bidea konpontzeko proiektua, 20.000 eurokoa.
Beste 25.000 euro kalistenia parke bat sortzeko erabiliko dira, eta beste 3.000 euro Luiaondoko tren geltokiko aparkalekua handitzeko azterlanerako.
Partidarik handiena, 60.500 eurokoa, Etxaurren Ikastolako jolastokia klima aldaketara egokitzeko erabiliko da.
Halaber, Udalak azpimarratu du handitu egin duela Aranzadiren partida. Izan ere, aurten ere indusketak egingo dituzte Babion.
Udalerrian energia berriztagarriak ezartzeko aukerak aztertuko ditu ikerketa baten bidez eta 36.000 euro gehiago gordeko dituzte amiantoak duen presentziari buruzko inbentarioa egiteko.
Gainera, administrazio-batzarretarako partida 140.000 eurora iritsiko da, eta euskara eta berdintasuna sustatzeko partidak ere handituko dituzte.