Afari solidarioa antolatu du Aspanovas elkarteak larunbat honetan, hilaren 31n, Arcos de Quejana jatetxean. Bildutako dirua Bizkaian minbizia duten haur eta nerabeen familientzako lehen Arreta Integraleko Espazioa sortzera bideratuko dute.
Sortze bidean dagoen baliabide berri hau laguntza gune bat izan nahi du minbizia duten haurrentzat eta haien familientzat. Bertan, laguntza fisiko eta emozionala eskainiko zaie, baita aholkularitza espezializatua ere.
Izan ere, elkarteak azaldu duenez, Bizkaian 60 familia baino gehiago dira egoera horretan daudenak, eta mediku-arretaz gain, bestelako bidelaguntza bat ere behar izaten dute bizitzako gainontzeko esparruetan.
Larunbateko hitzordua 20:00etan abiatuko da, eta mahaian eseri aurretik, 26 artisten obrak biltzen dituen La Robleda de los Sueños erakusketa bisitatzeko aukera egongo da Sonia García komisarioaren eskutik. Afaria, 60 euroko prezioan, 21:00tan izango da, eta Iñaki Basaberen kantek girotuko dute gaua.
Erreserba egin nahi izanez gero, 945 39 93 20 telefono zenbakiarekin edo info@arcosdequejana.com helbidearekin jar daiteke harremanetan. Gainera, proiektua ekonomikoki lagundu baina afarira ez bertaratzeko aukera ere badago.