Aiarako EAJko zinegotziek udalbatza aretoa utzi zuten atzo erregu eta galderen txandaren ondoren. Jeltzaleek adierazi dute legealdi osoan EH Bilduk ez diela modu formalean erantzun (hau da, idatziz) euren galdera edo ekarpenei.
"Aurreko astean erantzun bakarra jaso genuen idatziz, baina ez benetan erantzunez galdetzen genuenari. Hala ere, Aiara Batuzekin Gobernu akordioa hautsi ondoren, EH Bilduk argi eta garbi erantzun dio talde politiko horren galdera bati. Tratu-desberdintasuna agerikoa eta guztiz justifikaezina da", aipatu du Gentza Alamillo taldeko bozeramaileak.
Horren aurrean, jeltzaleek aldarrikatu dute tratu baztertzailea jasotzen dutela eta ez dela onargarria, herritar kopuru handia ordezkatzen baitute. "Ez dugu pribilegiorik eskatzen, baina beste talde batzuekin izaten ari den errespetu instituzional bera eskatzen dugu", erantsi du Alamillok.
Udalbatza uztearen erabakia, azaldu dutenez, ez da arinki hartua izan, eta salaketa politikoa egiteko baliatu dute. Horren helburua da EH Bilduk jarrera aldatzea EAJri dagokionez.