Aiarako Udalak ostegunean onartu zituen 2025eko aurrekontuak eta hiru milioi euro izango ditu bere jarduera finantzatzeko. EH Bilduko gobernu taldeak argitu duenez, Aiara Batuzen babesa izan du horretarako eta bere iradokizunak eta apirilean udalerrian burutu zen parte-hartze prozesuan jasotako proposamenak ere txertatu dituzte.
Aurrekontuak ahalbidetuko dituen egitasmoen artean, honako hauek nabarmendu ditu EH Bilduk: Ibaguengo kirol-pista egokitzea, udaletxeko ekitaldi-aretoaren egokitzapen akustikoa erabilera anitzeko areto gisa erabiltzeko, Arespalditzako parkeko anfiteatroa egokitzea eta Luiandoko pista estalia ixtea.
Partida handiena, 60.500 eurokoa, Etxaurren Ikastolako jolastokia berdatzeko erabiliko dute. Hiri Antolamenduko Plan Orokorra idazteko ere 32.000 euroko inbertsioa egin beharko dute.
Herritarren partaidetza
Aiararren parte hartzerako prozesuaren bitartez, ordea, hurrengo proiektuak jarri dituzte balioan: Arespalditza eta Ibaguen arteko oinezkoentzako bidea egokitzeko proiektua idaztea (20.000 euro), Udaletxe zaharraren eraikina birgaitzeko proiektuan inbertitzea (80.000 euro), eta amiantoak udalerrian duen presentziari buruzko inbentarioa egitea (36.000 euro).
Azkenik, Udalak azpimarratu du obra eta inbertsioei dagokienez, 70.000 euro gorde zaizkiela administrazio-batzarrei obretarako. Horrez gain, euskara eta berdintasuna sustatzeko partidak handitu dituzte, bai eta abeltzaintza eta nekazaritza sustatzekoak ere. 35.000 euro bideratuko dituzte horretara guztira.