Aiarako EAJk oharra plazaratu du salatzeko, bere iritziz, udal gobernu taldea ez dela betetzen ari hauteskunde kanpainan hartutako konpromisoak euskara sustatzeari dagokionez.
Gentza Alamillo bozeramaileak hiru kritika egin dizkio Pruden Otegi EH Bilduren alkateari, bereziki. Hasteko, Aiaraldeko Euskalgintza Kontseiluarekin sinatutako akordioa ez betetzea leporatu dio. Jeltzaleen aburuz, horren adibidea da udal aldizkariaren lizitazioa egin zutenean, ez zutela jaso argitalpena %50ean elebiduna izatea eskatzen zuen klausula.
2024-2027 Euskara Plana
Gentza Alamilloren ustez, egungo udal gobernu taldeak 2024-2027 Euskara Planean ere huts egin du: "Planak oso ekintza zehatzak jasotzen ditu 2024 eta 2025 urteetarako, baina asko ez dira martxan jarri ere egin. Argi dago ez dela lehentasuna alkatearentzat, kanpainan defendatzen zuena gorabehera".
Azkenik, EAJk salatu du hirigintza indartzeko zerbitzuaren lizitazioan ere egindakoa: "Aurreko legegintzaldian, gu agintean geundela, zerbitzu hori euskaraz ez bermatzea leporatu ziguten. Orain, horretarako aukera dutenez, ez dute nahitaezko baldintza gisa ezarri. Euskararen ezagutza 100etik 5 punturekin bakarrik baloratzen da. EH Bilduk benetan ari zela frogatzeko aukera zuen, eta ez du egin".
"Euskara ezin da kanpaina-baliabide hutsa izan: plangintza, lidergoa eta benetako borondatea behar ditu udal-kudeaketan ere ohiko hizkuntza izateko", adierazi du Gentza Alamillok.