Babioko herri harresituaren sekretuak azaleratzeko lanean ari dira aurten ere Aranzadi Zientzia Elkarteko kideak. Izan ere, iaz indusketak egin ordez, ikerketa geofisikoa egin zuten erabakitzeko nondik joko zuten hurrengo urratsek. Datu horiekin, pasa den asteko astelehenean ekin zioten lur azpian dauden etxebizitzak bilatzeari, mendi tontorrean.
Aurtengo indusketen helburua ere bada sakontzea defentsa sistemaren funtzionamenduan eta horretarako larunbatera arte egongo dira beharrean.
Bisita gidatua
Jon Obaldia izoriarrak berak zuzentzen du proiektua 2018tik eta aurrerapauso handiak egin dituzte Babioko ondare kultural eta historikoaren jakintzan.
Gainera, Obaldiak arreta berezia eskaini dio aurkikuntzen berri emateari eta hori bera egingo du larunbatean 10:30ean mendiko tontorrean, bisita gidatua eskainita. Izoriako Administrazio Batzarrak ere babesten du ekintza.
Burdin Haroko herrixka
Orain arte lortutako informazioak iradokitzen du Babioko herri harresitua Kristo Aurreko VIII. mendetik V. mendera luzatu zela.
Han bizi zen komunitateak nekazaritza eta abeltzaintza erabiltzen zituen bizirauteko eta defentsa sistema sofistikatua zuen beste komunitateen mehatxuei aurre egiteko.
Berez, gizarte gerlaria ere bazen eta guda euren egunerokotasunean zegoen txertatuta. Horregatik, babes elementu naturalak baliatzen zituzten eta harrizko hesiak gehitu zizkieten.
Argazkiak: Aranzadi Zientzia Elkartea