Abenduaren 21ean lehiatuko zen Aiara Ziklokrosaren edizio berria bertan behera uztea erabaki du Iñaki Isasi Taldeak. Antolatzaileek oharra plazaratu dute eta jakinarazi dute 2019an lehenengo aldiz egin zutenetik, arazo eta oztopo ugari izan dituztela.
Urterik urte traba horiek saihesten asmatu dute, baina aurten ez dute lortu eta horregatik ez da egingo 2025eko edizioa, ezinezkoa baita. Laguntzaile guztiei eskerrak eman dizkiete eta euren ekarpena aitortu dute.
Aiaraldea Komunikabidea harremanetan jarri da antolakuntzarekin eta galdetu dio behin betiko edo behin-behineko erabakia den eta erantzun duten oraindik ezin dutela zehaztu.
Erreferente bat ziklokrosaren egutegian
Iñaki Isasi Taldeak adierazi duenez, hasieratik euren asmoa izan da parte-hartzaileei zein zaleei ahalik eta lasterketarik onena eskaintzea. Hori agerikoa izan da ibilbideetan (urte luzez aldapa malkartsuak prestatuta, adibidez), baina baita erakarritako txirrindularien kalitatean ere.
Aiarako Ziklokrosak Omar Fraile, Alicia Gonzalez edota Gorka Izagirre bezalako profesionalak ekarri ditu Ibaguenera, eta Euskadiko zein Arabako Txapelketak ere erabaki dira bertan.
Izan ere, Euskadiko Ziklokros Txapelketa bi aldiz egon da jokoan Ibaguengo kirolgunean eta Arabako Txapelketa ere hainbat aldiz erabaki da Aiaran.
Horrez gain, Omar Fraile, Alicia Gonzalez, Gorka Izagirre edota Oier Lazkano profesionalek erakutsi dute euren trebezia bertan.
Tokiko kirolarientzat ere hitzordu berezia izan da: Iker Colmenerok, Hodei Muñozek, Lukene Trujillanok edota Iñaki Carrok garaipenak lortu dituzte aurreko edizioetan.