Aiarako EAJk Pruden Otegi EH Bilduko alkateari egotzi dio udalerriko 23 Administrazio Batzarrei ordainketa berandu egitea. Jeltzaleek eurek argitu dutenez, aste honetan egin dute erakunde horiei dagokien ekarpen ekonomikoaren erdia. Oposizioko talde nagusiak azpimarratu du diru hori urteko lehen hiruhilekoan jaso behar zutela kontzejuek.
"Alkateak ordenantzak ezarritako epeak ez betetzeaz gain, Administrazio Batzarren Batzordeko presidente zela ere bete ditu. Paradoxikoa da arau hau betetzen dela zaindu beharko lukeena izatea arauari ez ikusiarena egiten diona", adierazi du Gentza Alamillo jeltzaleen bozeramaileak.
Oposizio taldeak azpimarratu du EAJk gobernatzen zuenean onartu zela araudia eta horren helburua zela kontzejuen likidezia bermatzea euren jarduerak aurreikuspenez prestatzeko.
Gauzak horrela, udal gobernu taldeari leporatu diote "planifikazio eta sentsibilitate falta" eta Pruden Otegi alkateari eskatu diote udal ordenantzak datozen ekitaldietan ezarritako ordainketa-epeak zorrotz betetzeko, batzarrek dagokien finantzaketa garaiz eta behar bezala jaso dezaten. EAJren ohar osoa hemen irakur daiteke.