Aiarako Euskararen Asteburua arrakastatsua izan da. Aurtengo edizioa hiru ekintzatan banatu dute. Ostiralean ikuskizuna eskaini zuten eta antolatzaileek oso ondo baloratu dute: "Kalitate handiko bakarrizketa izan zen: neska gazte batek bere sentimenduak idazten ditu egunerokoan; maitasuna, ikasketak, euskara, nortasuna.... Pijamaz jantzita bihotza guztiz zabaldu zuen artistak".
Larunbatean, aldiz, aiararrak eurak izan ziren protagonista eta udalerriko mapa osatu zuten, Administrazio Batzar guztiak kokatuta herriko mapan. Pandemiaren ostean utzi zuten ekintza hori, baina aurten bestelako planteamendua egin dute: "Aiarako Hizkuntzen Mapa aurkeztea izan zen aitzakia puzzlea osatzeko. Aiaraldeko Euskalgintza kontseiluak proposatutakoari ekin zioten aurreko ikasturtean Etxaurren ikastolan. Beraz, iaz egin zuten lanaren azalpen laburrak eman genituen plazan, umorea tarteka", azaldu dute. Guztira, 21 herrialdeko bizilagunak dituzte Aiaran eta lau hizkuntza baliatzen dituzte: euskara, gaztelera, errumaniera eta arabiera.
Azkenik, igandean I. Mikrobideoen Lehiaketaren ordua heldu zen. Jende andana bertaratu zen prestatutako ikus-entzunezkoak erakarrita eta partaideak protagonista izan ziren arratsaldeko lehen partean. "Guztira sei mikrobideo jaso genituen; sariduna Zuhaitz Dantzaria bideoa izan zen", aipatu dute. Hala ere, sari gehiago banatu zituzten.
Jarraian, Igande Arratsaldeak Familian ekimenaren ereduari jarraiki, askaria eta eskulan tailerra izan zuten bertaratutakoek. Gau Beltza ate joka dagoenez oihalezko mamu bat egin zuten.
Argazkiak: Hogeitalau elkartea