Duela astebete Aiarako EAJk proposamena mahaigaineratu zuen Udalean ostiral arratsaldetan ludoteka zerbitzua eskaintzeko Luiaondon zein Arespalditzan. Berez, jeltzaleen ideia da ekimen pilotua izatea eta zenbait hilabeteren ondoren emaitzak ebaluatzea, erabakitzeko benetan beharrezkoa den.
Hala azaldu du Gentza Alamillo bozeramaile duen taldeak: "Ideia erraza da: martxan jartzea, funtzionamendua ebaluatzea eta familien eskaerari erantzuten dion egiaztatzea. Hortik aurrera, datuekin erabakitzea, eta ez burutazioekin".
Alamillok berak honakoa adierazi du: "Duela urte batzuk, gobernuan geundela, Aiarak ludoteka zerbitzua zuen Luiaondon eta Arespalditzan, eta familia askori erantzuten zien. Horregatik, uste dugu akatsa dela eredu hori baztertzea, haren erabilgarritasuna berriro aztertu gabe".
Gaztelekuan aldaketak
Aiarako EAJk ideia hau lotu du udal gobernu taldeak Gaztelekuan egin nahi dituen adin aldaketekin, osagarria dela iritzita.
Hala, jeltzaleek azpimarratu dute egitasmo pilotuak datorren ikasturteari begira zerbitzu egonkorra ezartzearen bideragarritasuna baloratzea ahalbidetuko lukeela: "Kontziliazioaz, zerbitzu publiko erabilgarriez eta familiei entzuteaz ari gara. Kontua ez da bakarrik adina aldatzea, baizik eta benetan erabiltzen diren baliabideak eskaintzea".