Soxon sortutako komunitate energetikoak ekin dio bere bazkideentzako elektrizitatea produzitzeari. Guztira 16 kide daude eta horri gehitu behar zaio Administrazio Batzarra bera, zeinak hamaika argi publiko eta zentro soziala hornitzen dituen.
Jadanik 4,75MWh banatu ditu azpiegitura fotovoltaikoak -kontzejuaren eraikin batean kokatuta dagoena- eta bi urteko prozedura itxi da horrela. Izan ere, Soxon 2024an hasi ziren egitasmoa lantzen. Komunitate Energetikoen Sarearen bitartez lortu zuten babes juridikoa kooperatiba abiatzeko eta fakturak kudeatzeko.
Gero finantzazioa ere eskuratu zuten Energiaren Euskal Erakundearen bitartez. Zehazki, proiektu osoak 49.227,17 euroko inbertsioa eragin du. 36.575 euro EEEk berak eman zizkien eta gainerakoa bazkideek eurek ordainduko dute urtero kitatu behar duten kuota bitartez. Hain zuzen, hamar urtez 1.265 euro ordainduko dute guztien artean eta bakoitzak bere partaidetzaren arabera egingo du ekarpen ekonomikoa.
Iberdrolaren oniritziaren zain ia urtebete
Edonola ere, bere betebeharrei azkar egin bazien aurre, ia urtebetez egon da geldirik azpiegitura energetikoa. Iazko Aste Santuan instalazioa amaituta egon baitzen, baina Iberdrolak martxora arte luzatu du konexioa.
Aldaketa klimatikoa, auzolana eta Administrazio Batzarra
Soxoko proiektuaren oinarrietan, bazkide batek azaldu duen moduan, hiru zutabe daude. Alde batetik, aldaketa klimatikoari aurre egitea, karbono isurketak murriztea eta autonomia energetikoa handitzea. Bestetik, auzolana eta kontzejua bera. Herritarren artean bultzatu dute egitasmoa, soxotarrek gozatuko dute eta kooperatiba ez da instalazioaren jabe, baizik eta Administrazio Batzarra bera. Horrela ziurtatu nahi dute jendea joan ala etorri, bitarteko hori beti izango dela herriarena.