Zirku txikia Ibagueneko futbol zelaira helduko da ekainaren 6 eta 7an. Taupa Euskaltzaleen Mugimenduaren Eusfera ekimenaren barruko ekintza izango da, Hogeitalau elkartearekin elkarlanean antolatutakoa. Bi egunetarako jarduera anitzak antolatu dituzte, betiere zirkuaren unibertsoarekin lotutakoak: magia eta antzerki tailerrak, malabareak, aurpegi margoketa, ikuskizunak… Tailerretan izena eman beharra dago eta inprimaki hau bete behar da horretarako.
Maiatzaren 7tik 17ra, Euskal Herri osoko herri ugaritan egingo dituzte Eusferarekin lotutako ekintzak. Aiaran, berez, hilaren 16 eta 17an ospatuko zuten ekimena, baina ekaineko lehen asteburura atzeratu dute. Euspazioak, beraz, herriko haurren eta gurasoen elkarguneak izango dira, eta herri bakoitzean modu ezberdinean ezaugarrituko badira ere, hiru elementu partekatzen dituzte: haur eta gurasoei bideratuta daude, parte hartze aktiboa sustatzen dute eta euskara dute ekimenaren erdigunean.
Horren aurretik, ordea, etxean etxekoekin misioak egitea proposatzen du Taupak, guztiak haurren unibertsoa euskalduntzeko helburuarekin. Erronka horiek betetzeko baliabideak Eusferaren web atarian aurki daitezke.
Hogeitalau euskara elkarteak Taupak proposautako ekintzekin bat egin du eta adierazi du Aiaran “aurrerapausoak ematen” jarraitu nahi dutela “aisialdia, kultura kontsumoa, erreferenteak, kirola, etxeko hizkuntza praktikak… euskaldunagoak izan daitezen”.