Aiarako Udalak argi berdea eman die aurtengo aurrekontuei eta behin-behineko onarpena bozkatu dute udalbatzan, EH Bildu eta Aiara Batuz taldeen babesarekin.
Udal gobernu taldeak nabarmendu du berrikuntzak daudela 2026ko proiektuan, menditik zura ateratzeko zubi mugikorra erosteko gorde diren 15.000 euroak, adibidez.
Halaber, lehen sektorea dinamizatzeko Lurretik Bat programan sakontzeko 10.000 euro erreserbatu ditu tokiko erakundeak, Lurkoik azken urtean egindako azterlanaren ondoriozko tailerrak eta prestakuntzak gauzatzeko; eta beste 12.000 euro bideratu dituzte udalerrian abereentzako osasun-plan bat abian jartzeko.
Horrez gain, aurrekontu parte-hartzaileak egiteko prozesuaren ondorioz, beste 20.000 euro erreserbatu dituzte Luiaondoko pista gorria hobetzeko.
Gainera, guraso-elkartearentzako dirulaguntza handitu dute talde psikopedagogikoaren lana ordaintzeko, eta lurralde orekari begira, iaz administrazio batzarrei zuzendutako finantzaketarako eta zerbitzuetarako diru-partiden igoera mantendu da, 147.000 euro orotara.
EAJ oso desados
Udal oposizioko talde nagusia, bestalde, oso kritikoa izan da onartu diren aurrekontuekin eta anbizio eta planifikazio falta egotzi die prentsa ohar baten bitartez.
EAJk adierazi du hainbat zuzenketa egin zituela udal-zerbitzuak indartzeko, administrazio-batzarrei babesa emateko eta lehen sektoreak zein herritarrek egindako eskaera zehatzei erantzuteko, baina ganeratu du gehienak atzera bota dituela EH Bilduk.
Jeltzaleek administrazio batzarren diru kopurua 10.000 eurotan igotzea proposatu zuen, honako egitasmo hauek burutzeko: Gorobel mendilerroari lotutako osasun-planerako partida zabaltzea eta birformulatzea, Barrena kaleko (Las Vegas auzoa ere esaten zaio) hiri-berroneratzea bultzatzeko hurbileko bulego bat sortzea edota Luiaondoko kalistenia parkean bankuak eta paperontziak jartzea.