Bi urteko bide motz baina oparoa egin du organikoaren birziklapenak Aiarako Kuadrilan. 82.000 kilo materia organiko bildu dira urteko lehen 9 hilabeteetan.
2014an eman zituen Aiarako Kuadrillak materia organikoa birziklatzera bideratutako lehen pausoak. Hondakin mota horietarako 31 edukiontzi jarri zituzten Kuadrilla osatzen duten bost udalerrietan, eta organikoa biltzeko 500 kit banatu zituzten proiektuan parte hartzeko prestutasuna adierazi zuten familien artean.
Ekimena, baina, ez zen lehen urrats horretara mugatu. Zabalduz joan da egitasmoa. Gaur egun organikoa jasotzeko 49 edukiontzi daude: 17 Laudion, 16 Amurrion, 8 Artziniegan, 6 Aiaran eta 2 Okondon. Gainera, datorren urtean gehiago jartzeko asmoa dutela adierazi dute Kuadrilatik, zerbitzua herrigune handienetan inplementatzeari begira.
Nabarmen hasi da baita edukiontzi horiek erabiltzen dituzten herritarren kopurua ere, 2.200 familiek baitute dagoeneko kit-a. Establezimendu ugari ere batu dira ekimenera: Laudioko 37, Amurrioko 23, Aiarako 4, Artziniegako 6 eta Okondoko bat. Hortaz gain, 14 ikastetxetan ere dabiltza organikoa birziklatzen, udaberritik.
Lortutako emaitzak esanguratsuak dira oso: aurten 82.000 kilo materia organiko jaso dira Kuadrillan urtarriletik irailera bitartean, iaz baino % 1,2 gehiago.
Zabaltzen jarraitzeko asmoa
Ekimena zabaltzen jarraitzeko asmo tinkoa adierazi dute Kuadrillatik. Hainbat informazio puntu jarriko dituzte azaroan eta abenduan, dinamikara herritar gehiago erakartzeko asmoz.
Horretaz gain, Hondakinen Prebentzio eta Birziklapenerako Astea ospatuko da. Hainbat ekimen egingo dituzte. Radio Llodion, esaterako, irrati lehiaketa egingo dute azaroaren 21etik 25era. Hilaren 26an, berriz, birziklapen eta berrerabilpen tailerra egongo da Amurrioko Juan Urrutia plazan, 10:00etatik 14:00etara, Arabako Foru Aldundiaren eskutik.