Superilargiaren fenomenoa puri-purian jarri dute hedabideek eta horri buruz mintzatu da aiaraldea.eus Bizkaiko Astronomia Elkartearekin.
Aditu taldeak adierazi du, nahiz eta oihartzun handia izan duen, giza begiek ez dutela gaitasuna sumatzeko “Superilargia”, tamaina horietako objektuak ezberdintzeko ez baitira gai.
Halaber, elkarteak azaldu du NASAk egindako ohar baten ondorioa izan dela guztia. Berez, gaurko ilargia gizakiontzat normala izango da. Gehienez, distira berezia izango du.
Ikusteak mereziko du, hala ere
Dena den, elkarteak uste du mereziko duela ilargia ikustea, hilero bezala, baldin eta lainorik ez badago.
Bizkaiko astronomiazaleen aburuz, ikuskizun hutsa da ilargi betea, eta horregatik noizean behin txangoak antolatzen dituzte behatzeko. Eskualdeak, gainera, herriguneetatik ateratzeko aukera handiak ematen ditu horretarako.
Bestalde, Eduardo Rodriguez Bizkaiko Astronomia Elkarteko presidenteak iradoki du ilargira so jartzea gomendagarria dela horizontetik gertu dagoenean. Antza, argitu gabe dagoen efektu optikoaren ondorioz, handiago ikusten da eta.