Serapio Lopezek, Izar Mendigurenek eta Asier Rubiok eskuan dute finalerdietan kantatzeko txartela. Urriaren 28an abiatu zen Arabako Bertsolari Txapelketako kanporaketa fasea. Guztira 24 bertsolari lehiatu ziren finalerdietarako txartela eskuratzeko, baina arazo pertsonalak medio 21 izan dira txapelketan aritu direnak. Horien artean daude Asier Rubio luiaondoarra, Izar Mendiguren laudioarra eta Serapio Lopez baranbioarra. Rubiok eta Lopezek urriak 29an kantatu zuten Lantziegon. Serapio Lopez hirugarren geratu zen, eta Asier Rubio laugarren. Izar Mendigurenek, aldiz, larunbatean izan zuen txapelketa Araian, eta hirugarren postua lortu zuen. Hala, bigarren fasera igaro dira hirurak kanporaketetako lau saioetako irabazleekin batera, sailkapen orokorrean puntu gehien bildu dituzten 9 partaideen artean baitaude.
Hurrengo fasea, neguan
Urtarrilaren 21ean aurkeztuko da 2017ko Arabako Bertsolari Txapelketa Aretan. Otsailetik martxora, 2016ko finalistak batuko zaizkie sailkatutako bertsolariei: Manex Agirre, Iñaki Viñaspre, Oihane Perea, Zigor Enbeita eta Xabi Igoa; Ruben Sanchezek ez baitu parte hartuko. Hauek izango dira, beraz, finalerdien zerrenda osatuko duten bertsolariak: Manex Agirre, Iñaki Viñaspre, Oihane Perea, Zigor Enbeita, Xabi Igoa, Asier Otamendi, Andere Arriolabengoa, Iker Agirre, Rikardo Gonzalez de durana, Paula Amilburu, Serapio Lopez, Peru Abarategi, Izar Mendiguren, Jagoba Apaolaza, Felipe Zelaieta, Ander Solozabal, Asier Rubio eta Jon Ruiz de Pinedo.