Gaur (azaroak 3) argitaratu da Aiaraldea Egunkariaren 58. zenbakia. Hainbat gai izango ditu hizpide hamabostekariak. Protagonista nagusia Mateo Balbuena izango da, Gerra Zibilean San Pedro mendian borrokan aritu zen militante komunista. Berari eginiko elkarrizketa luzearen laburpena topatu ahal izango du irakurleak agerkariaren erdiko orrietan.
Egongo dira baita bestelako gai batzuk ere. Ohikoan bezala, azken bi asteetan eskualdean jazotako albiste esanguratsuenen bilduma eskainiko du Herriz herri atalak. Sozioekonomia atalean etxebizitza hutsei zergak jartzea ahalbidetzen duen foru arau berria izango da ardatza. Etawasol eta Zaskaleari taldeek prestatutako jardunaldien nondik norakoak irakurri ahal izango dira Jendartean, eta eskualdeko graffitigileen historiaren laburpen bat jasoko du Kulturak, “Agur” ezizenarekin ezagututako margolariari eginiko elkarrizketa batekin batera.
Espainiako Cow Horse txapelketa irabazi duen Aitor Aspiazu izango da Kirol orrietako protagonista nagusia. Kontran, berriz, Angela Marañon Orueta kaiku egileari eginiko elkarrizketa topatuko du irakurleak.
Kolaboratzaile ugari
Ohikoan bezala, hainbat kolaboratzailek hartu dute parte egunkari honen sorkuntzan. Txutxi Ariznabarreta, Itziar Larrazabal, Asier Amondo, Txani Rodriguez eta Itziar Urquijo arduratu dira iritzi zutabeak idazteaz. Floren Usiak, bere aldetik, komiki-tira egin du.