Orozkoko, Arrankudiaga-Zolloko eta Arakaldoko EH Bilduko udal hautagaiek oharra zabaldu zuten atzo salatzeko Carlos Urquijo Gobernuko Ordezkariaren jarrera. Hego Uribeko zenbait kiderekin egin dute adierazpena.
Izan ere, koalizioko hautetsiek azaldu dute espainiar ikurra jartzeko edo euskal preso politikoen eskubideak aldarrikatzen duen ikurra kentzeko eta hainbat agindu bidali diela azkenaldian. Esaterako, espainiar gobernuak agindutako murrizketen ondorioz 2010ean udal langileek izan zuten soldataren zatia berreskuratzeko lortutako akordioari errekurtsoa jarri dio Arakaldo, Arrankudiaga eta Ugaoko udaletan -hots, produktibitate saria %0,6a igotzeko akordioari-.
Demokraziaren kontrako izendapena
EH Bilduk nabarmendu du Carlos Urquijo hautatu duela hauteskundetan garrantzirik ez duen alderdia eta inposiziotzat jo ditu bere ekimenak.
Horren aurrean, aldarrikatu dute: “Defenda dezagun gure udalen autonomia eraso arrotz hauen aurrean, jarrai dezagun aurrean gure herrietan hartutako erabaki demokratikoekin. Gu aurrera jarraitzeko prest gaude, gure bizilagunen eskubideak bermatzeko hautu argia egiten dugu. Jorratu dezagun gure bide propioa, inolako kanpo injerentzia eta inposiziorik gabekoa, eta eraman dezagun aurrera gure herriekiko dugun konpromisoa”.