Bihar argitaratuko da Aiaraldea Egunkariaren 56. zenbakia. Ohikoan bezala, ugariak izango dira bertan jorratuko diren gaiak, baina oraingo honetan kultur arloko gaiek okupatuko dituzte orri gehienak.
Lehen orrietan eskualdeko albisteen errepaso bat topatu ahal izango du irakurleak. Hurrengo orrietan, berriz, hainbat gaiei buruzko artikuluak egongo dira. Sozioekonomia atalean Tubos Reunidos izango da protagonista, enpresak apirilean ezarritako enplegua erregulatzeko espedienteari buruzko artikulu batekin. Jendartea atalak, aldiz, Amurrioko herritar batek abian jarritako sinadura bilketa izango du hizpide, guardiako farmazia iraunkor bat eskatzeko.
Begibistan Zinema Asteak hartuko du egunkariaren erreportaje nagusiaren espazioa. Iragan astean egin zen jaialdi hori Amurrion. Antolatzaileen balorazioa eta aurrera begirako proiektuak azaltzen ditu erreportajeak. Hortaz gain, Leyre Berrocali eginiko elkarrizketa ere egongo da orri horietan, aktore amurrioarrak jaso baitzuen jaialdiko Ohorezko Txapela.
Kultura atalean Txani Rodriguez idazleari eta Goiatz Dutto musikariari eginiko elkarrizketak topatu ahal izango ditu irakurleak. Kirolean, berriz, lehiakortasunari buruzko artikulu bat egongo da, Gotzon Martin Sanz txirrindulariari eginiko elkarrizketa batekin batera.
Kontrazalean, ohikoan bezala, elkarrizketa bat egongo da baita. Oraingo honetan Josu Respaldiza Ozaeta eta Alejandro Olabarria Etxebarria orozkoarrak izango dira elkarrizketatuak, Euskal Herriko Marmitako Txapelketa irabazi baitute.
Ez dira faltako ezta egunkariaren kolaboratzaileek ekarpenak. Norberto Aldaiturriaga, Juan Luis España, Koldo Gilsanz, Inma Roiz, Javi Aspuru eta Lucia Menoyo arduratu dira iritzi zutabeak idazteaz. Urtzi Odrizolak, bere aldetik, bideo-jokoen zutabea prestatu du, eta Jabi Isasik margotu du komiki-tira.