Hasi dira Osakidetzaren Amurrioko Osasun Zentro berria eraikitzeko obrak, Mendiko kaleko 3. zenbakiko orubean. 2,75 milioi euro inbertituko dituzte zentroan eta, aurreikusi dutenaren arabera, datorren urterako egongo da eraikita.
Anbulatorio berriak 1.340,36 metro karratuko azalera izango du, eta 33 langile arituko dira bertan: familiako 6 mediku, 2 pediatra, erizaintzako 8 profesional, emagin bat, 4 administrazio-laguntzaile, EAGeko 4 mediku, EAGeko 4 erizain eta EAGeko 4 zaindari. Zentroa ez da Amurrioko herritarrak artatzera mugatuko. Aiara, Artziniega edo Urduña bezalako beste herri batzuetako biztanleei ere eskainiko zaie arreta.
Zerbitzu ugari eskainiko ditu anbulatorio berriak, Osakidetzatik jakinarazi dutenez: “osasun-arreta orokorra kontsultan eta etxean, etengabeko arreta-puntuak, prozedura diagnostikoak eta terapeutikoak, sustapen eta prebentzioko jarduerak, haurren eta nerabeen arreta, emakumeen arreta, helduen eta adinekoen arreta, arreta aringarria eta kirurgia txikia”, besteak beste.
Eraikin "erosoagoa"
Osakidetzak gaineratu du zentro berria “erosoagoa” izango dela eta langileek “lan egiteko baldintza hobeak” izango dituztela. “Kontsulta gehiago egongo dira, mugikortasun murriztua duten pertsonen beharretara egokitutako espazioak jarriko dira eta itxarongela handiagoak eta hobeto prestatuak egongo dira”.