Atxeta definitzeko zaila den territorio batean kokatua dagoela esan daiteke. Arrankudiaga-Zolloko auzo bat da, baina askoz hurbilago dago Areta eta Laudiotik. Dena dela, horrek ez dio historia eta izaera propioa izatea galarazi. Hori argi ikusi daiteke auzoko jaien egitarauari erreparatuz gero, ez baita makala jai batzordeko kideek irailaren 17ko astebururako aurkeztu duten programa.
“Adin guztietako pertsonentzako ezin hobeak dira Atxetako Jaiak, edonork gozatzeko moduko egitaraua baitute”. Hala adierazi dute antolatzen ari direnek. Umeengan pentsatuta eginiko ekintzek pisu handia hartzen dute jaietan. Lehiaketa gastronomikoa edo helduentzako bestelako ekintzak egiten diren une berean umeentzako ekintzak daude baita”, azaldu dute Jai Batzordetik, “aitek eta amek ere gozatzeko aukera izan dezaten euren seme-alabak begiraleekin jolasten edo tailerretan parte hartzen ari diren bitartean”.
Horregatik animatzen dira Arrankudiaga-Zolloko eta Aretako familia asko asteburua Atxetan pasatzera. “Ez da falta Laudiotik, Amurriotik, Orozkotik edota Ugaotik gerturatzen den jendea ere, une onak igarotzera datozenak, umeentzako ekintzak dauden orduetan batez ere”.
[video:https://vimeo.com/75087987]
“Oinarrizko ekintzak”
“Oinarrizkoak” bihurtu diren zenbait ekintza ere bildu dituzte ekitaldi sortan. Igel-toka da jarduera horietako bat. Txapelketa horren XXVIII. edizioa izango da aurtengoa. “Joko tradizional bat bezala hasi zena igande arratsaldean arrakasta handia duen ekintza bilakatu da”, erantsi dute Jai Batzordetik, “Badaude inoiz huts egiten ez duten parte hartzaileak, giro bitxia sortzen da”.
Urte pila bat ditu Txapelketa Gastronomikoak ere. Baina duela zazpi urtetik hona “Jesus Gorostizaga memoriala” izenarekin berrizendatu da. “Jesus urtero etortzen zen Arrankudiagatik, eta igandeko bazkaria prestatzen zigun: paella eta solomoa piperrekin”. Bera omentzeko aldatu zioten izena zitari.
Hainbat auzokideren artean antolatzen dituzte festak, bilera irekien bidez. Ez da lan makala ekintza guztiak aurrera ateratzeko egin behar izaten dutena. “Estresatu egiten gara batzuetan, baina beti izaten dugu tartetxo bat marmitakoa egin eta dantzatzeko!”.
EGITARAU OSOA
Irailak 17, larunbata
Baserriko produktuen salmenta goiz osoan zehar
12:00 // Txupina eta kalejira
12:00 // Tailerrak eta puzgarriak
12:30 // J. Gorostizagaren omenezko gastronomia txapelketa, VII. Marmitako eta tortilla Lehiaketa
14:30 // Sari banaketa eta bazkaria
16:00 // Umeentzako makillajea, puzgarriak eta tailerrak
18:00 // Buruhandiak
19:00 // Txokolatada herrikoia
19:30 // Pailazoen Ikuskizuna
Mozorratuta doazen haurrek saria jasoko dute
21:00 // Disko festa Ramonekin eta zumba animazioa Izaskunekin
21:30 // Txistorrada herrikoia
22:00 // Monologoa
23:00 // Disko Festa
Irailak 18, igandea
12:00 // Diana eta kalejira
12:00 // Umeentzako talo tailerra
12:30 // Meza
12:30 // Dantza plaza Patxi Perezekin
13:00 // Apar festa
14:30 // Bazkari herrikoia eta bingoa
18:00 // “Cotillas” ikuskizuna, Gorka Aginagalderen umore ikuskizun berria
19:15 // XXVIII. Igel txapelketa
20:30 // Txapelketaren sari banaketa
21:00 // Azken bolandera eta jaien amaiera