EH Bilduk eskualdeko zerrendakideen aurkezpena egin du gaur. Horrela, Eva Blanco, Julen Arzuaga, Irati Mendiguren, Maddi Isasi eta Natxo Urkixo egon dira gaur Laudioko herrigunean. Elena Beloki ez da Aiaraldera etorri, baina bera ere hautagaia izango da Gipuzkoan.
Eva Blanco eta Julen Arzuaga mintzatu dira koalizioaren egitasmoei buruz Eusko Legebiltzarreko hauteskundeei dagokienez. Eva Blanco amurrioarrak nabarmendu du EH Bilduren hautagaien aniztasuna eta azpimarratu du euren helburua dela Araba eta Euskal Herria hobetzea.
Horretarako, Eva Blancok adierazi du konplazentzia alde batera utzi behar dela. EH Bilduko kidearen aburuz, askotan horretan erortzen dira politikariak Euskal Herria gainerako lurraldeekin alderatzean. Eva Blancoren ustez, aldaketa beharrezkoa da gehiengoaren mesederako -150.000 langabetu daude EAEn- eta horregatik hiru erronka proposatu ditu koalizioak: 60.000 lanpostu duin sortzea, iruzur fiskala jazartzea eta euskal pentsio sistema gauzatzea.
EAJrekin eta Ahal Dugu Podemosekin akordioak
Julen Arzuaga aretarrak ere hitza hartu du. Arnaldo Otegiren inhabilitazioari buruz ez da gehiegi mintzatu: “erabaki politikoa izan da, eta ez juridikoa”. Aldiz, EH Bilduko programa aipatu du jakinarazteko gobernu programa dela.
Koalizioaren proposamenak erdiesteko, Julen Arzuagak iragarri du beharrezkoak izango direla akordioak EAJ eta Ahal Dugu Podemos alderdiekin hiru ardatzen inguruan; neurri sozialak, erabakitzeko eskubidea eta bakea eta normalizazioa, alegia.
Iraileko hauteskundetan Arabako zerrendan egon ordez, Julen Arzuagak Bizkaikoa osatu du. Bere iritziz, eskualdeak ez du kide bat galduko, baizik eta legebiltzarkidea irabaziko. Aldi berean, gogoratu du Areta ere Bizkaian eta Araban banatuta dagoela.