EAEko alderdiak hasi dira Eusko Legebiltzarrerako hauteskundeen zerrendak aurkezten eta aurpegi ezagunak jaso dituzte EAJk eta EH Bilduk.
EAJ
Jeltzaleek jarri dituzte Arabako zerrendan 8. postuan Almudena Otaola okondoarra, 9. Estibaliz Larrauri amurrioarra, 16. Aroa Cerrada laudioarra eta zinegotzi ohia, 20. Iker Ibarrondo EGIko kidea, 21. Agurtzane Llano Artziniegako alkate ohia eta 23. Josune Irabien Amurrioko alkatea.
EH Bildu
Koalizioak hainbat aiaraldearrez ere osatu du Arabako zerrenda. Eva Blanco zinegotzia eta legebiltzarkidea 5. kokatu dute, 7. postua Irati Mendiguren laudioarrari dagokio, 12. hautagaia Natxo Urkixo Laudioko alkatea izango da eta 23. Maddi Isasi aiararra.
Bizkaiko zerrendan ere jatorriz Aiaraldekoa den Julen Arzuaga legebiltzarkidea izango da 4. hautagaia. Elena Beloki aretarra ere Gipuzkoako azken postuan kokatu dute.
PSE-EE
Sozialistek ere zerrenda jakinarazi dute eta Aiaraldeari dagokionez alde deigarriena da Txaro Sarasua laudioarra, birritan legebiltzarkide izandakoa, ez dagoela zerrendan.