Tubacex eta Aceralava enpresetako langile batzordeek iragarri dute bi orduko lanuzteak egingo dituztela berriro asteartean -uztailaren 26an, hain zuzen-.
Amurrio eta Laudioko lantegien sarreretan elkartuko dira beharginak 11:00etatik 13:00ak arte, 15:00etatik 17:00ak arte eta 22:30etatik 00:30ak arte.
Istripuak eta segurtasun beharra
Mobilizazioekin behartu nahi dute enpresetako zuzendaritza, segurtasun neurriak garatu eta hobetu ditzan. Izan ere, azkenaldian hainbat istripu gertatu dira.
Biktimak: behin behineko langileak
Sindikatuek salatu dute istripua jasan dituzten langile gehienek behin behineko kontratuak zituztela; batzuetan egun bakarrekoa edo bikoa. Horregatik, adierazi dute segurtasun trebakuntza nahikoa ez dutela izan.
Neurri zehatzak
Arrisku egoerari aurre egiteko, langileen ordezkariek zenbait neurri proposatu dizkiote enpresari; trebakuntza epe luzeagoak, zerbitzu medikuak txanda guztietan, langile berriei harrera egiteko plana, behin behineko kontratazioak ekiditeko plana eta lanpostu finkoak sortzea, eta prebentziorako zuzenketak betetzea.