Gaur Laudioko udalbatza aretoan bilera egin du Aiarako Koadrilak. 2016ko aurrekontuak onartu dituzte eta hori izan da jorratutako gai garrantzitsuena. Guztira, 2.567.680,85 euro izango ditu eskualdeko erakundeak zerbitzu komunak ordaintzeko (adibidez, hondakinen kudeaketa).
EAJren babesarekin egin dute aurrera aurrekontuek eta gainerako alderdiak abstenitu dira -Orain Amurrio, Okondo Aurrera, Aiara Batuz eta EH Bildu-, Omnia ezik. Alderdi independenteak kritikatu du urtero aldatzea udalen ekarpenak eta iradoki du ekarpena finkoa izan beharko litzatekeela. Gainera, adierazi du zenbait arlotan ikuspuntua aldatu behar dela, adibidez, euskarara bideratutako dirua egun bakarrean gastatu beharko litzatekeela uste dute, Euskara Eguna antolatuta.
Ander Añibarro koadrilako presidenteak erantzun du ekarpen finkoak zehazteak ez lukeela erraztuko udal txikien partaidetza erakundean. Bestalde, gogoratu du, teknikariaren ustetan, egun eta leku bakarrean euskarazko aurrekontua gastatzeak ikusgarritasun urria izango lukeela. Izan ere, diru kopurua murritza da, 7.000 euro inguru.
Hondakinen kudeaketa onartu zuen Laudiok atzo
Atzo ez-ohiko udal osoko bilkura egin zuten Laudion eta, besteak beste, onartu zuten hondakinen kudeaketa Aiarako Koadrilaren esku uztea eta horretarako indarrean dagoen hitzarmena berritzea. EH Bilduk eta EAJk alde bozkatu zuten, Omniak eta PSE-EEk aurka eta PP abstenitu zen.