Kirol ezberdinen denboraldiak amaitu ostean, hainbat kirol elkartek kanpus ezberdinak egiten dituzte, umeek udan zehar kirola egiten eta ikasten jarraitu dezaten. Gehienak ekainaren amaieran eta uztailaren hasieran izaten dira, gero oporretara joaten baitira.
Futbola, saskibaloia, tenis, gimnasia,… hamaika kirol egin daitezke udako kanpusetan. Batzuk oso goiz hasi edota izena emateko epea pasa egin dira, IV. Aiara Futbol kanpusa edota Aresketa gimnasia taldeak antolatutakoak, baina badira zenbait oraindik inskripzioa irekita dutenak.
Amurrioko Zaraobe Saskibaloi taldeak bi astetan zeharreko kanpusa antolatu du ekainaren 27tik uztailaren 8ra. 1998. Eta 2008. Urte tartekoek eman dezakete izena eta nahi duenak aste bat edo bietan apuntatu daiteke, prezioa 65 (aste 1) eta 120 (2 aste) euro izanik. Izena emateko azken eguna ekainaren 24an izango da.
Tenisa egiteko aukera egongo da baita, bai Amurrion eta baita Orozkon ere, Tenis Sustraia taldearen eskutik. Bi kasuetan ekainaren 27tik uztailaren 22ra izango dira ikastaroak eta hilabete osorako edota aste soltetan eman daiteke izena.
Orozkon 5 urtetatik gorakoek hartu dezakete parte eta klaseak astelehenetik ostiralera izango dira, ordu batekoak, aste bakoitzak 25 euroko prezioa izango duelarik. Amurrion aldiz 5 eta 14 urte bitarteko umeek eta nagusiek hartu dezakete parte. Haurrek 9:30tatik 11:30tara edota 11:30tatik 13:30tarako klaseak izango dituzte astelehenetik ostiralera eta nagusiek 13:30tatik 14:30tara. Aste bakoitzeko prezioa 50 eurokoa izango da.
Hurrengo denboraldirako kide bila
Kanpusez gain, kirol talde ezberdinek kide berriak bilatzeko kanpainak abiatu dituzte, eskubaloia, futbola eta saskibaloian batez ere.
Laudioko eskubaloi taldeak bere ateak ireki ditu ume eta gazteek kirola ikasi eta gozatzeko aukera eskainiz. Hurrengo denboraldiari begira haur gehiago batzea du helburu Laudioko klubak eta horretarako 6 eta 16 urteko umeentzat zuzendu du deialdia.
Futbolean emakumzeko eta gizonezko taldeak kide bila ari dira. Altzarrate eta Urduñako nesken taldeak kanpaina berriak abiatu dituzte haien taldeak indartzeko asmoz. Aurreko denboraldian emaitza onak lortu ondoren, kluba handitzen jarraitu nahi dute eta horretarako telefono bidez apuntatzeko aukera luzatu dute.
Amurrioko Etorkizuna eta Kaskagorri taldeek ere izena emateko deialdiak zabaldu dituzte. Ekainaren 30a arte eman dute epea bertan apuntatu nahi duen orok aukera izan dezan izena emateko. Kaskagorriko taldeetan 1998 eta 2004. Urteen artean jaiotakoek dute jokatzeko aukera eta Etorkizunako taldeetan 2005. Eta 2010. Urte bitartean jaiotakoak. Izena emateko haien kontu korrontetan 50 euroko diru-sartzea egin beharko dute eta uztailaren 2an, 10etatik 13tara, El Reforren aurkeztu beharko dira
Saskibaloian aldiz, Laudioko Sugarrak taldeak bideo baten bidez hurrengo denboraldirako taldeak aurkeztu ditu eta bertan parte hartu nahi izanez gero, haien sare sozialen bidez harremanetan jartzeko eskatu dute, bai Twitter eta baita Facebook-en bidez.