Gasteizen eta Angelun izan diren lau hilketa matxistak salatzeko kontzentrazioak deitu dituzte Aiaraldeako Udalek. Amurrion gaur egingo dute bost minutuko elkartaratzea plazan, 19:00etan. Urduñan, berriz, bihar izango da gaitzespen ekitaldia, 20:30etan Foru plazan.
Jarrera aktiboa
Atzo eman zuten gertakarien berri. Lapurdin gizon batek emaztea eta 11 eta 16 urteko bi alabak hil zituen. Gazteizen emakume bat erahil eta ibaira bota dute. Horren harira bi erakundeek adierazpen instituzionalak zabaldu dituzte jarrera aktiboaren aldeko deia eginez. “Edozein indarkeria-adierazpenen aurrean salatzea, ez onartzea, isilik ez egotea eta biktimei babesa erakustea” eskatu dute Amurriotik. Urduñan gogorarazi dute “erailketak izebergaren punta” direla eta “guztion arazoa” dela “indarkeria matxistari aurre egitea”.
Hilketa hauen harira ere, Euskal mugimendu feministak Gasteizen atzo arratsaldean egingo zuen manifestazioa. EH Bilduk aurreikusita zituen kanpainako ekitaldi guztiak bertan behera utzi zuen, Laudiokoa barne. Halaber, Artziniegan atzo ospatu zuten udako soltizio jaian salaketa ere egin zuten. Gaur eguerdian Gasteizko udaletxe aurrean kontzentratu dira Eusko Jaurlaritzako, Arabako Foru Aldundiko eta hiriko Udaleko ordezkariak hainbat herritarrekin batera gertaerak salatzeko.
016
Tratu txarrak pairatzen badituzu edo kasuren bat ezagutzen baduzu, deitu 900 840 111 telefono zenbakira EAEn edo 016 zenbakira Estatu osoan. Doakoak dira eta ez dute arrastorik uzten fakturan.