Aiarako Koadrilak, eskualdeko udalekin batera, birziklapenaren aldeko kanpaina berri bat abiaraziko du uztailean. “Ez bota dirua zaborretara, birziklatu” lemapean, herritarrak hondakinak gaika bereiztearen garrantziaz ohartaraztea helburu dute eta horretarako herrietan saioak egingo dituzte.
Ekimen horren baitan edukiontzira bota ohi diten hondakin ezberdinak bereizteko karakterizazio publikoak burutuko dituzte. Amurrion uztailaren 1ean izango da, Juan Urrutia plazan, goizez. Artziniegako frontoian egun horretan bertan arratsaldez. Luiaondon uztailak 8an egingo dute, arratsaldean Padura kaleko pista gorrian, eta Okondoko San Bartolome plaza inguruan 9an goizez.
Tailerrak eta zozketak
Ekintza nagusi horretaz gain, saio horietan haurrei zuzendutako berrerabilpen tailerrak egongo dira. Kafe kapsulekin bitxiak egiteko aukera egongo da, hondakin ezberdinekin musika instrumentuak sortuko dituzte eta plastikozko ontziekin arkatzak, loreontziak eta beste hainbat elementu erabilgarri egingo dituzte. Gainera, eskualdeko produktu ekologikoen otarrak zozketatuko dituzte “Birziklatzeak saria du” lelopean.
Bestalde, saio horietan informazio puntuak egongo dira. Bertan birziklatzeko kitak zein poltsa konpostagarriak banatuko dituzte. Herritarrek birziklapenaren inguruan izan ditzaketen zalantzak argitzeko aukera ere izango dute.