REBER AHATEA (Leon, 2011) Arturo Perez Reverteren artikulu bati esker (“El pato maketo”) bilakatu zen ezagun. Iaz hasi zen Aiaraldeko jaietan erreportari gisa lan egiten, Aiaraldea.eus-en bekadun gisa.
Aurten ere Aiaraldeko jaietan ikusiko zaitugu?
Bai, Aiaraldeko jaiak oso gogoko ditut, bereziki bertan aritzen den jendea zirikatzea. Askok uste dute festetan lan egitea gogorra dela, baina niri izugarri gustatzen zait adarra jotzea, eta ez zait une aproposagorik bururatzen hori egiteko.
Jaia asko daude udan. Zeinetan egongo zara zu?
Aiaraldea Komunikazio Leihoko lagunek ez didate oraindik lan-kronograma pasatu, baina imajinatzen dut ahalik eta jai gehienetan egongo naizela, mikroa eskuan, elkarrizketatzeko biktima bila.
Zeintzuk dira zure biktima kuttunenak?
Gustuko dut pregoilari, parrandazale, txupinero eta ordezkari politikorengana jotzea, jai giroan egindako galderek ez-ohiko erantzunak izan ohi dituzte eta.
"Baina nire izaera ez da baztertzailea, edonorengana jo dezaket, zuregana ere, irakurle!"
Jaiek nondik dute gehiago, arriskutik ala gozamenetik?
Jai giroak alde arriskutsua ere badauka. Behin ia garagardotan ito nintzen. Umeek esku luzeegiak dauzkate, eta tiraka daude beti. Ez dakit nola ez didaten besoren bat kendu oraindik. Oso espezie sendoko ahatea izanik ere, noizean behin sufritzen dut.
Bide batez, ondo legoke Aiaraldea.eus-eko boluntarioren batek nire jaka jostea, jaietako zauriak nabaritu ez daitezen.
Espezie gogorra zarela aipatu duzu, zein da zurea ba?
Ni txosna-ahatea (Anas Gaupaseris) naiz. Eskualdeko girora egokitutako espeziea, hain zuzen.
Hasieran espezie inbaditzailea nintzen, baina Arturo Perez Revertek ez zuen nire historia guztiz kontatu El Semanal gehigarriko “El pato maketo” artikuluan. Barnetegian euskara ikasten egon nintzela esatea ahaztu zitzaion, eta erabat moldatu naizela tokiko habitatera.
Ez zara espezie inbaditzailea, orduan?
Ez.
"Tokiko espezie erdaldun ugari baino hobeto nago egokituta"
Bestalde, ez daukat ugaltzeko asmorik, ur kutsatuetan hainbeste egon ostean ez dakit gai naizen, beraz, ez dut ezer inbadituko.
Ikusi Reber Ahateak orain arte eginiko bideo-erreportaje guztiak: