Eusko Jaurlaritzako Ingurumen eta Lurralde Politika Sailak abian jarri du Lurralde Antolamenduaren Gidalerroak (LAG) berrikusteko prozesu parte-hartzailea. Horretarako, EAEko eskualdeetako arlo funtzional bakoitzeko tailer bana antolatu du. Aiaraldeari dagokiona asteazkenean, ekainak 15ean, izango da. Tailer irekia Amurrioko Katekesi eraikinean (Araba kalea, 10) burutuko da 18:00etatik aurrera eta bertan eskualdeko teknikariek, herritarrek eta tokiko eragileek EAEko estrategia zehazteko ideiak proposatzeko aukera izango dute, etorkizuneko erabilera, kontserbazioa eta garapenari buruzko ekarpenak eginez.
Online partehartzea
Tailerretara bertaratu ezin daitezkeen pertsonek Irekia webgunean parte hartu ahal izango dute. Gunean argitaratu du Jaurlaritzako LAGak berrikusteko oinarrizko dokumentua, horri ekarpenak egiteko. Gainera, gai bakoitzean hasitako eztabaidetan eta inkestetan online parte hartzeko aukera ere egongo da. Horrez gain, Twitteren, #DOT_Euskadi traola erabiliz, eta Facebooken, Lurraldea profilean iruzkinak idatziz ere ideiak plazaratzeko parada egongo da. LAGak berrikusteko prozesuak 3 urte inguru iraungo ditu. Informazio eta aurrerapen guztiak webgunean eguneratuko ditu erakundeak.