Tubacex enpresak oharra kaleratu du 2016ko jardueraren balorazioa egiteko. Zuzendaritzak azaldu du 500.000 euroko galera izan dutela lehen hiruhilekoan petrolioaren inbertsioen murrizketen eta lehengaien prezioaren jaitsieragatik.
Izan ere, 121,4 milioi euroko salmentak egin ditu urtarrilean, otsailean eta martxoan, iaz baino %24 gutxiago. Edonola ere, 75 milioi euroko kontratua eskuratu du Ekialde Hurbilean hodi OCTGak ekoizteko; produktu horrekin inoiz lortutako kontraturik handiena, alegia. Apirilean hasi ziren ekoizten Amurrion.
Zor finantzarioa
Enpesako arduradunek jakinarazi dute aurreikusi zutela egoera txarra igaroko zutela merkatuaren egoera dela eta. Ondorioz, bere eskaintza sakabanatu eta kostuak murriztu dituzte (Asian saltzen dituzte tutu gehinak, esaterako).
Hala ere, zorpetze finantzarioaren maila ez da eurek nahiko luketeena, bikoitza baizik. Dena den, urtean zehar kutxa egitea eta hori konpontzea espero dute.
LABek uste du murrizketak prestatzen ari direla
Sindikatu abertzaleak oharra zabaldu du adierazteko, bere aburuz, enpresako zuzendaritza prestatzen ari dela murrizketak.
Langileen ordezkarien ustetan zuzendariaren diskurtsoak antz handia dauka Tubos Reunidosen edo Arcelorren entzundakoarekin. Zentzu horretan, horrelako neurrien aurka egongo dela iragarri du LABek.
Bestalde, sindikatuak gogoratu du Tubacex taldeak etekin handiak izan dituela azken urteotan, baita 2015ean ere, beste enpresa batzuek arazoak zituzten bitartean. Horrez gain, nabarmendu du Kantabrian inbertsioak egin dituztela.