Orozkoko, Urduñako eta Amurrioko Udalek eskaera egin diete Eusko Jaurlaritzari eta Arabako zein Bizkaiko Foru Aldundiei: Landa Eremuko Garapenaren Planari dagokionez landatasun mailen sailkapenak berrikusi ditzaten. Prozesua oraindik irekita dago eta Urduñako zenbait aldarrikapen onartu dituzte, adibidez.
Landatasun mailen sailkapenak landa eremuko guneek diru-laguntzak eskuratzeko aukera errazten dute: Leader edo Erein programek banatzen dituzten laguntzak, alegia. Hori bai, horretarako gradu 1, 2 edo 3 izan behar dute, eta gehienek 4. gradua jaso dute.
2015-2020 urteetan Landatasun mailak aztertzeko erabili dituzten irizpideen arabera, udalerri osoaren ezaugarriak hartu dituzte aintzat, eta ez eremu bakoitzarena.
Administrazio batzarrak Amurrion eta Urduñan
Hori dela eta, Amurrio, Urduña eta Orozkoko zenbait auzo eta Administrazio Batzar kaltetuak izan daitezke, tokiko erakundeen ustez. Esate baterako, Larruazabal edo Arrastariako Administrazio Batzarren beharrak oso ezberdinak dira Urduña edo Amurrioko herriguneekin alderatuta. Aitzitik, Administrazio Batzarren aurrekontuak diru-laguntzen menpe daudenez askotan, murrizketek eragin handia izango lukete.
Orozkoko helegitea
Orozkoko Udalak helegitea jarri dio Eusko Jaurlaritzari eta Bizkaiko Foru Aldundiari, landatasun maila oso eskasa aitortu diotela nabarmentzeko.
Tokiko erakundearen ustez, ez dauka zentzurik herrigunetik 5 kilometrora dauden auzoek Arakaldo edo Arrankudiagako landatasun maila bera izatea.
Gainera, azpimarratu du herriko abeltzainek Arakaldo, Arrankudiaga, Zeberio, Artea, Areatza eta Zeanurikoek beste ganadu daukatela.
Hori gutxi balitz, udalak gogoratu du Orozko dela Bizkaian landa eremuko gune gehien daukan herria eta leku horietan herritarrek garraio publikorik ez dutela.