Gaur (apirilak 21) argitaratuko da Aiaraldea Egunkariaren 50. zenbakia. Ohikoan bezala, hainbat gai topatu ahal izango ditu irakurleak argitalpena osatzen duten 16 orrietan.
Herriz herrikako atalean azken bi asteetan Aiaraldean gertatutako albiste esanguratsuenei errepasoa emango zaie.
Erreportaje nagusiak eskualdeko hainbat herritan ematen den fenomeno bat izango du hizpide: gazteek euren aisialdirako alokatzen dituzten lokalena. Udalek eta bestelako instituzioek dituzten datuak plazaratuko ditu testuak, eta hainbat lonja erabiltzaileren iritziak plazaratuko ditu. Kale-inkestak ere gai hori jorratuko du.
Kultura atalean, berriz, beste erreportaje batek hartuko du nagusitasuna: Artearen Hazia erakusketari buruzkoa. Erakusketa horren nondik norakoak azalduko ditu artikuluak, bertan parte hartzen duten hainbat artista gazteren adierazpenekin.
Jendartean, berriz, elkarrizketa bat egongo da: Heziberri dekretuak Lehen Hezkuntzan planteatzen dituen azterketaren aurka posizionatutako guraso bati eginikoa.
Futbola eta zumba
Kirolean, berriz, CD Urduñak Bizkaiko Kopa nola irabazi duen jakin ahal izango du irakurleak, azken partiduaren kronika batekin eta taldeko kapitainari eginiko elkarrizketa batekin.
Bukatzeko, Izaskun del Cerro zumba irakasleari eginiko elkarrizketa egongo da kontrazalean.
Kolaboratzaile ugarik hartu dute parte 50. zenbaki horren erredakzioan. Andoni Aldekoak, Eneko Gastakak, Patxi Iturregik eta Irati Marañonek iritzi zutabeak prestatu dituzte. Txetxu Urkijok, bere aldetik, zinema proposamena idatzi du. Komikia, berriz, Zaraobe Institutuko irakaslea den Gorka Belaskorena da.