Bihar argitaratuko da Aiaraldea Egunkariaren 49. zenbakia eta, ohikoan bezala, hainbat gai izango ditu ardatz.
Herriz herrikako atalean Aiarako Jaiek hartuko dute protagonismoa, baina egongo da bestelako albisteak irakurtzeko pasada ere.
Errortaje nagusia atzerrira lan bila doazen aiaraldearrei buruzkoa izango da. Hainbat pertsonei eginiko elkarrizketa jasoko ditu testuak, EUSTATek eskainitako datuekin uztarturik.
Sozioekonomia atalean Tubos Reunidoseko Enplegua Erregulatzeko Espedienteak hartuko du protagonismoa. Afera horren azken xehetasunen berri jasoko du irakurleak.
Jendartea atalean, berriz, Ane Uriarte eta Esti Bidegureni eginiko elkarrizketa egongo da, zeinetan elkarrekin hilerokoaren inguruan prestatu duten tailerraren inguruan mintzatuko diren bi laudioarrak.
Erraldoiak, buruhandiak eta roller derbya
Laudio eta Urduñako erraldoi eta buruhandi berriei buruzko artikuluak beteko du Kultura atalaren lehen orria. Bigarrenean Zaskaleari emakume sortzaileen taldeko kideei eginiko elkarrizketa topatuko du irakurleak, beste hainbat kultur albisterekin batera.
Kirol atalean roller derbya gertutik ezagutzeko parada egongo da, kirol hori praktikatzen duen Irune Tellez Roblesen eskutik. Bestelako eduki batzuk ere egongo dira.
Mandoek tiratutako gurdi baten gainean Rocioko Erromeriara bidean dauden lau laudioarrei eginiko elkarrizketarekin itxiko da egunkaria.
Ohikoan bezala, ugariak dira egunkariaren zenbaki honetan parte hartu duten kolaboratzaileak. Txema Urkijo, Agapito Valle, Asier Amondo, Txani Rodriguez, Egoitz Bernaola eta Ainhoa Comas arduratu dira iritzi-zutabeak idazteaz. Urtzi Odriozolak, bere aldetik, bideo-jokoen atala osatu du, eta Aimar Gutierrez arduratu da kontrazaleko komikia marrazteaz.