Errotatiban dago jada bihar argitaratuko den Aiaraldea Egunkaria. 47. zenbakia izango da eta, ohikoan bezala, hainbat gai izango ditu hizpide.
“Herriz herri” albisteen atalean azken bi asteetan eskualdean jazotako notizia nabarmenei errepaso zabala emango zaie.
Hurrengo bi orrietan bina artikulu topatu ahal izango ditu irakurleak. Bata etxegabetzeen problematika aztertuko du, eskualdeko ikuspuntu batetik begiratuta. Bestea, berriz, Aiaraldeko analfabetismo-tasaren inguruan mintzatuko da.
Youtuberrak protagonista
Baina erreportaje nagusiak oso bestelako gai bat izango du ardatz: youtuberrak. Interneteko fenomeno berri horren nondik norakoen azalpen labur bat jasoko du testuak, eta youtuberren eta euskararen arteko harreman eskasa ere izango du hizpide, eskualdeko youtuber esanguratsu batzuei aipamena egitearekin batera.
Kulturan, berriz, bi eduki nagusi egongo dira. Alde batetik, Eneko Arcas aktoreari bere lehen eleberriari buruz eginiko elkarrizketa egongo da. Beste orrian, berriz, Aketxa Merino historialariak kontakizun bat plazaratuko du, Aiaraldean aspaldian egondako bidelapur talde baten ingurukoa, Jabi Isasiren marrazki batez lagundurik.
Kontrazalean, berriz, egurrezko jokoak egiten dituen Felix Pikatza izango da protagonista.
Kolaboratzaileak ere ugariak eta anitzak izango dira zenbaki honetan. Andoni Aldekoa, Mikel Kormenzana, Koldo Gilsanz, Luis Vil eta Andrea Ulloaren iritzi zutabeak egongo dira, eta baita Rubik eginiko komikia eta Urtzi Odriozolak prestatutako Zelda bideo-jokoari buruzko artikulua ere.
Aiaraldea Herri Elkargoko kideek gaur arratsaldean jaso dute egunkaria euren posta elektronikoan, eta bihartik aurrera egongo da formatu fisikoan eskuratzeko aukera, eskualdeko saltoki, eskola, taberna zein bestelako guneetan.