Instituzioetara iritsi da trenbide sarean ematen ari diren arazoen gaineko eztabaida. Iragan ostegunean EH Bilduren udal-taldeak mozioa aurkeztu zuen Amurrion. RENFEk eta ADIFek kudeatzen duten trenbide sarea Eusko Jaurlaritzaren esku geratzea eskatzen zuen mozioak, “zerbitzu publiko, seguru, sozial eta jasangarria lortzeko”.
Hortaz gain, Eusko Jaurlaritzari “egungo trenbideen akats, gabezia eta beharren inguruko ikerketa” egitea ere eskatzen zuen EH Bilduk, eta eskaera horiekin bat egiteko deia luzatu zien koalizioak tren-geltokia duten beste udalerriei. Mozioa aho batez onartu zuten Amurrioko udal talde politiko guztiek.
Laudion, EAJ-PNVren proposamena
Laudion, berriz, EAJ-PNV izan da mozioa aurkeztu duen taldea. Jeltzaleek trenbidean egin beharreko hobekuntzak egitea eskatzen diete ADIF eta RENFE enpresei, irisgarritasuna bermatu eta kutsadura eta zarata ekiditeari begira egin beharrekoak batez ere. Hortaz gain, “trenbideen gaineko konpententziak” Eusko Jaurlaritzaren esku uztea ere eskatzen du EAJ-PNVren mozioak, eta Eusko Jaurlaritzari eskatzen dio trenbideetako azpiegituren gabezien gaineko ikerketa bat abian jartzea.
Jeltzaleen mozioa gaur arratsaldean eztabaidatu eta bozkatu da, Udal Osoko Biluran.