“Ametsen liburua” ia bostehun lagunen artean osatutako egitasmoa eskualdean aurkeztu egingo da otsailaren 23an, Laudioko Herriko Plazako aretoan.
Liburu horrek XX-XXI mendeetako ehunka euskal errepresaliatu politikoen ametsak jasotzen ditu era dotorean, izan ere, oso edizio bereziko liburua suertatu baita: ia mila orrialdeko 7 kiloko liburutzarra da, modu txukun eta zainduan argitaratua, errepresaliatu (presoak, deportatuak, iheslariak, torturatuak...) bakoitzeko orrialde bina, argazkiz lagunduta.
Parte hartzeak oso anitzak dira, ia mende oso bateko errepresaliatuen ametsen berri ematen duelako, Luzio Urtubiatik, Joseba Sarrionandiaraino, askoren artean. Ekarpen hauekin batera, ia berrogeita hamar euskal sortzaileren artelanak tartekatu dira.
Proiektuan Aiaraldeko zazpi lagun aritu dira: Orozkoko Jose Anjel Aramendi; Laudioko Isidro Murga, Fidel Largatxa, Pablo Gorostiaga, Mikel Etxebarria eta Joxe Blanco; eta Urduñako Aletxu Zobaran.
Aurkezpenean Ametsen Liburuaren bultzatzaile eta koordinatzaile izan den Jokin Urainek hitz egingo du, eskualdeko errepresaliatuekin batera. Liburua salgai egongo da.