Emakumeei bereziki zuzendutako autodefentsa ikastaroak egingo dituzte Laudion eta Orozkon martxoan. Jarduera horien helburua da erasoen aurrean defendatzeko teknika errazak eta eraginkorrak.
Laudion martxoaren 13an, igandean, izango da tailerra eta egun osoko iraupena izango du. Goizeko 10:00etan hasiko eta 14:00etara arte luzatuko da. Arratsaldean 15:30etan ekingo diote berriro ere eta 19:30era arte iraungo du.
Ekimena Kultur Etxean egingo dute oraingoan eta genero indarkerian eta autodefentsan aditua Maitena Monroy FeministAlde elkarteko kideak gidatuko du. Ikastaro honetan parte hartzeko beharrezkoa da aurrez izena ematea Laudio Udaleko Berdintasun Zerbitzuan (94 404850), partaide kopurua mugatua baita. Adin guztietako emakumeek parte hartu dezakete. Herrian erroldatutako emakumeek 3 euro ordaindu beharko dute eta gainerakoek 5 euro.
Orozkon
Orozkon egingo duten ikastaroa Matxintxu Emakumeen Elkarteak bultzatu du. Martxoaren 19an egingo dute Kultur Etxean. Honetan ere Maitena Monroy izango da saioaren gidari baina 14 urte baino gehiago dituzten emakumeek soilik hartu dezakete parte.
Egun osoko tailerra izango da, 10:00etatik 14:00etara eta 15:30etik 19:30era. Parte hartzaile kopurua mugatuta dagoenez, izena ematea beharrezkoa izango da (634 409 176). Elkartetik jakinarazi dute bazkideek lehentasuna izango dutela izena ematerako orduan.