Elizak 18 ondasun bere izenean jaso ditu eskualdean, eta horien artean Mendeikako administrazio batzarraren egoitza dago. Mendeikak 1988an erosi zion apaizetxea apezpikutzari eta geroztik konpondu eta erabili du, bere jarduerak gauzatzeko.
Batzar administratiboko arduradunek azaldu dute jabetzako eskriturak dituztela eta erregistrora joko dutela egoera argitzeko asmoz. Laster bilera deituko dute Mendeikako herritarrek horren berri izan dezaten eta eman behar dituzten urratsak eztabaidatu ditzaten.
18 jabego
Mendeikako kasuan zein gainerakoetan, Eliza ez da herriko ordezkariekin harremanetan jarri, nahiz eta Gasteizko Apezpikutzak eta Bilboko Apezpikuak iaz jaso zituzten elizaren izenean Aiaraldeko hainbat ondasun; 18 guztira.
Batzuk eraikin ezagunak dira: Aretako Santa Ana eliza, Orozkoko Ibarra auzoko parrokia eta hilerria, Okondoko San Prudentzio baseliza, Larrinbeko Santiago Dorrea, Arrankudiagako apaizetxea eta Etxegoieneko baseliza.
Gehienetan tokiko erakundeek inbertsioak egin dituzte konponketak ordaintzeko eta, zenbait kasutan, aurretik publikoak izan ziren -Etxegoienen, adibidez, baseliza herrikoa izan zen, harik eta 80ko hamarkadan Elizak eskuratu zuen arte- edo herritarrek eraiki zituzten.
Bestalde, Elizak lursail ugari erregistratu du eskualdean, Araban guztiak: Etxegoienen bi, Izorian bat, Luiaondon bat -San Lorentzon, alegia-, Maroñon beste bat, Lekamañan 3 eta Baranbion bi -biak Garrastatxun-. Ondasun horiei esker, guztira, 52.250 metro karratu inguru erregistratu ditu; 5 hektarea baino gehiago.
Euskal Herrian
Berria egunkariak egindako ikerketaren arabera, Elizak 1.600 jabego baino gehiago bere egin ditu horrela Hego Euskal Herrian; Nafarroan 1.087, Gipuzkoan 388, Araban 72 eta Bizkaian 65, hurrenez hurren.