Ezohiko jostailu katalogoa argitaratu zuen Toy Planet enpresak iaz. Mutilak tradizionalki neskei ezarri zaizkien jostailuekin jolasten irudikatzen zituen katalogo horrek: umeak gurdiak eramaten eta sukaldean platerak garbitzen agertzen ziren. Neskak, berriz, erremintak maneiatzen edota motor gainean ibiltzen. Katalogoa argitaratu ostean enpresak eginiko balorazioaren arabera, bezeroek positiboki hartu zuten genero rol aldaketa hori irudikatu izana.
Munduko jostailu industria, baina, horrelako aldaketak egitetik oso urrun dago oraindik. Aurkako joera da nagusi. Jostailuen industria garatzen joan den neurrian geroz eta gehiago murgildu da sexismoan, Laura ‘Gaelx’ Montero kazetariak Diagonal egunkarian azaldu duenez. Kolore arrosa eta urdinaren erabileren adibidea jarri du Monterok: “70. hamarkadan hasi zen garatzen bi kolore horien eta neska eta mutilen arteko lotura, lehenago ez zen asoziazio hori egiten”. Enpresek “merkatu-hobiak” bilatu nahi izatean datza sexismoa sustatzearen zergatia, kazetariaren arabera.
Gomendioak
Jostailuak erosterako orduan kontuan hartzeko zenbait gomendio ematen dituzte adituek. Alde batetik, umeak eskatzen duen oparia erostera zuzenean joan ordez, eskaera kritikoki aztertzea. Jostailu kooperatiboak hobestea gomendatzen dute. Hau da, umeak elkarrekin (neska eta mutilak) jolastea sustatzen dutenak. Garrantzitsua da baita jostailuek munduan dagoen genero, arraza, sexu joera edota kultura aniztasuna transmititzea, eta lehiakortasuna sustatzen duten jokoak ekiditea.
Monterok gaineratu du badaudela baita Gabonetako ohiko kontsumoarekiko alternatibak. Trukea eta bigarren eskuko objektuak jarri ditu adibide moduan. “Ume batentzat zaharra den jostailu bat berria izan daiteke beste ume batentzat. Zentzu horretan geroz eta ugariagoak dira jostailuen doako trukerako edo salerosketarako guneak”.