Udako kronika multimedia onenari saria eta Kronika originalenari saria eskuratu dute Gutierrezek eta Basarratek hurrenez-hurren. Horrela erabaki du Aiaraldea Komunikazio Leihoak antolatutako lehiaketaren lehen edizio honetako epai-mahaiak. Bidaia ez den kronika originalenari saria aldiz eman gabe uztea erabaki du.
Epai-mahaia Manex Agirre bertsolari eta euskara teknikariak, Itsaso Estarrona Alea Arabako astekariko kazetariak eta Josu Garaio Aiaraldea Komunikazio Leihoko kideak osatu dute aurten.
Jose Mari Gutierrezek jasoko du hortaz Wegoaz bidaia agentziaren eskutik bi lagunentzako Marokora bidaia eta tourra gastu guztiak ordainduta. Sari nagusia Gutierrezi emateko epai-mahaiak azpimarratu du bere lanaren haria memoriarena dela: "leitmotiv horri esker lortu du osotasuna eta koherentzia bere narrazioan: Normandia eta Aiaraldeko tokien memoria, pertsona historiko ezberdinen memoria (Aita Santuak, nobleak, kataroak, erregearen alabak…), herriko pertsonaiena (maistra, alkatea…), gertakizunen memoria (arteen botatzea…), irudi zaharrena...". Era berean nabarmendu dute Gutierrezen kronikak direla izaera multimedia handiena eta landuena izan dutenak.
Kronika originalenari saria Basarraterentzat
Ainhoa Basarrate laudioarraren lana ere aitortu dute epai-mahaiko kideek; "Kronikak irakurtzerakoan, laburtasunaren alde jo du: xehetasunak hartu, eta horietan oinarrituta, bizitakoa transmititu. Ainhoa Basarratek ondo egin du hori, audioaren baliabidearekin. Testuaren irakurketa atsegina egiten da, azpitik audioa entzunez. Erdi-selfiearen estetika ere nabarmentzekoa da, koherentzia eman dio sorta osoari". Basarratek 4 lagunenentzako asteburuko egonaldia nekazal-etxe batean eta bazkaria jasoko du sari.
Lehen edizioan 39 kronika
Aiaraldea Komunikazio Leihoko kideek balorazio positiboa egin dute lehiaketaren lehen edizio honetaz. Guztira 39 kronika multimedia jaso dira, gai eta ikuspegi askotarikoak bilduz: aisialdiari lotutako bidaien kronikak, brigada internazionalistetan emandakoak, jaietako kronikak, kontu xelebreagoenak... "Euskaraz idatzi eta ekoizteko joera sustatu nahi genuen, eta zer hobetu bada ere, maila batean lortu dugu".