Aiaraldea Komunikazio Leihoak urriaren 3an egin behar zuen “Aiaraldea eguna” bertan behera utzi du, Aiaraldeako hainbat jarraitzailek “Jaiaraldea” antolatu baitute, elkartearen bosgarren urteurrena ospatzeko. Aiaraldeako kideek adierazi dutenez azken astean mezu ezberdinak jaso dituzte: “Aiaraldea Egunkarian iragarkien gune bat 'okupatu' ziguten. Jakin dugunagatik gazte, heldu eta elkartekideei gonbidapen batzuk banatu dizkiete eta berriemaileek adierazi digutenez whatsapp bidezko mezu eta bideo umoretsuen bidez festaren inguruko zehaztasunak zabaltzen ari dira”. Bi ekimenek helburu bera dutenez, Aiaraldea Komunikazio Leihoak “Jaiaraldea” ekimenarekin bat egitea erabaki du.
Urteurren festa Laudioko Zubiko etxean
Bideo batean azaldu bezala, 20:00etan hasiko da festa, eta partaideek arropa zuri edo beltza eraman beharko dute. Deialdia irekia dela nabarmendu dute, bost urte hauetan proiektuaren parte izan diren zein etorkizunean izan daitezkeen aiaraldear guztiak elkartu nahi baitituzte: elkartekideak, webgunearen erabiltzaileak, Aiaraldea Egunkariko irakurleak... Laudioko Zubiko etxea izango da “Jaiaraldea” ospatuko den tokia. Aurreratu dutenez, janaria, edaria eta kontzertuak ez direla faltako. Izan ere, luntxean, ekitaldian eta gauean hainbat artistek hartuko dute parte: DJ Makalak, perkusionista kubatarrak, Esne potak taldeak...
[video:https://youtu.be/QCBZ6HL-Yvk autoplay:1]
[video:https://youtu.be/OH0qjMrrZvA]